إزاي تخنق على نفسك ؟

 إزاي تخنق على نفسك ؟

1-              إشتري كل يوم جرايد قومية وإقرأها كلها ... وركز على مقال رئيس التحرير تقرأه مرة كل 8 ساعات عشان تضمن إنك تكون مخنوق طول اليوم .

2-              وقّف أتوبيس زحمة أوي وإلّي واضح إنه مفيش فيه أي مكان ( ودي نظرة قاصرة منك .. لان فيه مقولة مبنية على تجارب عملية دايما الكمسري بيقولها  "ياريت البهوات ترجع ورا شوية توسع للناس إلي عالباب" ... والمقولة دي الكمسري بيقولها من اول الخط لآخره ) ....  وبعد ما تركب إدفس نفسك وإشغل أي حيز فراغ موجود في الاتوبيس .

3-              روح القسم بلّغ عن حاجة إتسرقت منك ... وقول للظابط بكل ألاطة : أنا مش ماشي إلا لما الحاجة إلي إتسرقت تجيلي حالا .

4-              قطّع نفسك مذاكرة في الثانوية العامة ... وبعد ما تجيب 99 % ... إدخل كلية بتاخد من 70 %

5-              إطحن نفسك مذاكرة في كلية هندسة وبعد ما تتخرج إشتغل دكتور أسنان .

6-              شجع فريق في الدوري ترتيبه القبل الاخير ... وعشّم نفسك طول السنة إنه هياخد الدوري أو هيطلع التاني .

7-              إسأل صاحبك الرغاي : مالك ساكت كده ليه ؟

8-              إركب ميكروباص أجرته نص جنيه وإدي السواق ورقة بمتين جنيه وقوله ممعايش فكة .

9-              داوم على سماع تصريحات المسؤولين أول بأول ... ولازم تبقى في غاية الإنصات كأنك بالظبط مستني المفتي لما ييجي عالتلفزيون عشان يحدد إذا كان بكره اول رمضان ولا المتمم لشعبان .

10-       عدّي من ادام محل جزارة وأعد إتفرج على اللحمة زي ما تكون واقف أدام محل ملابس ... وأول ما تحس إن الشيطان بيوسوسلك تشتري نص كيلو ... إستعيذ بالله وخد بعضك وطيران على البيت .

11-       إطلع من بيتكو من غير بطاقة  وادخل جوه أول عربية بوكس تقابلك بعد ما تتحايل على الظابط يقبض عليك تحرّي .

12-       أول ما تقبض المرتب بعزق نصه في أول يوم ... والنص التاني مشي نفسك بيه طول الشهر .

13-       كل ما حد يقولك إزيك قوله : مش ولا بد ... وكل ما حد يقولك حاجة  حتى لو واحد معدي بيسألك الساعة كام قوله : أنا مش متفائل .

14-       البنات ( اتكلمي مع واحد كل إلي تعرفيه عنه إنه إسمه مودي ... وعشمي نفسك إنه هيتقدملك )

15-       إتفرج على النشرة ... وطول ما انت بتتابع متبطلش تعليقات من عينة  : (يا خبر !  .... مش معقولة إلي بيحصل ده ! .... نفسي أسمع خبر عدل ) .... بس اوعى تقلب ... خليك لغاية ما تخلص كل الاخبار ... وبعد كده إقلب على نشرة تانية .... والحكاية تختلف لو واحدة هي إلي بتتابع ... فأول ما ييجي خبر وحش في النشرة صوّتي ولمي عليكي أمة لا إله إلا الله .

16-       روح قهوة أو كافيه عشان تتفرج على ماتش وأعد جنب واحد مش عاجبه أي حد في الماتش ... إلي هما بيفضلو طول الماتش بيرددو كلمات معينة زي ( يا عم شوط بقى .... يا عم باصي للجنبك يا إبن ال.....  عليا الطلاق الحكم ده متغدي مع الفرقة ... يا مدرب يا حمار حد يلعب علاء دوكشة  راس حربة ... دوكشة يترزع في أم الدفاع  عشان يدافع عن أم الجون ... استغفر الله العظيم يارب )

17-       تابع أخبار الاجور إلي بياخدها اللعيبة والممثلين وخلي معاك آلة حاسبة عشان لو السعر مكتوب بالدولار تحوله لمصري وتحسب الفلوس إلي بياخدها في الشهر وتقارنها بالمرتب إلي بتاخده ... وكمان لو فاضي إحسب المدة إلي هتشتغلها عشان تلم الفلوس  إلي اللعيب بياخدها في شهر واحد .

18-       روح أمن الدولة وقولهم أنا تبع الإخوان , ممكن اتأكد إن إسمي متسجل عندكو ؟

19-       إطلع رحلة مع إصحابك لدريم بارك تاني يوم العيد .

20-       بلّغ عن قضية فساد لمسؤول عندك في الشركة بشرط المسؤول إلّي هتبلغ عنه يكون  واصل ومسنود عشان يعرف يمرمطك كويس بعد ما تبلغ عنه .

21-       إركب في ميكروباص جنب واحدة شايلة على إيديها عيل صغير بشرط إنه يكون من النوع إلّي بيمارس العياط كهواية ... مش عشان هو عيل صغير ومفروض إنه يعيط وخلاص .

22-       إدخل في مناقشة مع واحد بيحب يعترض على أي حاجة ... فلو قولتله إن المية بتغلي عند 100 درجة ... هيعترض على كلامك ويقولك ما هي بتغلي برضه عند 110  ..... ولو قولته الشمس بتطلع كل يوم الصبح هيقولك مش شرط ممكن يبقى فيه غيوم ومتطلعش ..

المواقع إلي نشرت فيها الموضوع

http://maghnesium.com/forum/showthread.php?t=3163

http://www.3gypt.com/vb/thread340268.html

http://www.haridy.com/ib3/topic/1471-إزاي-تخنق-على-نفسك-؟/

تابع القراءة »

أنواع الدكاترة في الكليات ..

1- الدكتور إلّي مبيديش أكتر من جيد .


والدكتور ده إمتحاناته بتيجي من المريخ وعاوزة واحد من زحل عشان يحلها ..

ممكن يطب ساكت لو لقى طالب حل جميع الأسئلة صح ... وفي الحالة دي يبقى الطالب ده أكيد غشاش .. فيشيّله المادة من باب الإحتياط .

لو كل المحاضرات بيتكلم فيها عن تاريخ الفراعنة على سبيل المثال ... هتلاقيه جايب أسئلة ملهاش علاقة بالمنهج زي :

( إشتهر الفراعنة ببناء الأهرامات .. فقد بنى الملك خوفو الهرم الكبير منذ آلاف السنين )
- ما هي أشهر محلات الفول والطعمية الموجودة في شارع الهرم؟
- لماذا لم يستخدم الفراعنة الحديد في بناء الاهرامات على رغم من أن أسعار (حديد عز) أيام الفراعنة كانت برخص التراب ؟



2- الدكتور إلّي منهجه طويل أوي .


والدكتور ده أي ورقه بيلاقيها أدامه بيحطها في المنهج ... وممكن يكون بياكل سندوتش فول فيعجبه الكلام إلي مكتوب على الورقة إلي ملفوف فيها الساندوتش فيضيفها للمنهج ..

بيزعل أوي لما وقت المحاضرة يخلص عشان ملحقش يضيف كام إضافه للمحاضرة ..



3- الدكتور إلّي بيقرأ من الكتاب .


والكلام إلّي الدكتور بيقوله في المحاضرة هو نفسه الكلام المكتوب في الكتاب بتاعه ... ومع ذلك فيه طلبة بتخاف متحضرلوش ليقول كلمة من بره الكتاب ... وفي الغالب ولا الدكتور بيقول أي كلمة من بره الكتاب ولا الطلبة دول بيبطلو يحضرو للدكتور .



4- الدكتور المشتت .


الدكتور بتاع ( دوّرو على المعلومة عالنت ....إنتو عاوزين المنهج يجيلكوعالجاهز ؟! ... طلعو الكلام إلي شرحته من المرجع الفلاني ... إعملولي ريبورت عن الجزئية دي ) ..... وفي الآخر تكتشف إن منهجه عبارة عن كوكتيل يحتوي على ( 300 صفحة من المرجع الفلاني و400 صفحة من المرجع العلاني وعشرين موقع على النت .... ده غير الكلام إلي قالة في محاضراته ... وغير التقارير إلي كان طالبها طول الترم )

والدكتور ده بيسبب دربكة في نافوخ الطلبة ... فتلاقى الفص اليمين بتاع المخ ساح عالفص الشمال ... والمخيخ مش عارف هل هيستحمل الدربكة إلي في الدماغ دي ولا هيروح يقضيلو كم يوم عند البنكرياس لحد ما الأمور تستقر ومنهج الدكتور ده يخلص .




5- الدكتور إلّي بينجز ( المكروت ) .


والدكتور ده بيبقى غالبا وراه قطر بعد المحاضرة علطول فبيكروت المحاضرة عشان يلحقه ... فتلاقيه مسك الكتاب ( من صفحة 1 ل 20 سهلين إبقو بصو عليهم .... من 20 ل 30 كلام خدتوه في سنة أولى لا داعي لإعادة شرحه .... صفحة 31 ... آه صفحة 31 دي بقى مهمة جدا جدا ... لو سمحتو بقى كل واحد يسيب إلي في إيده ويركز معايا .... ولا أقولوكو إبقو اقروها .. سهلة ما فيهاش حاجة) ... وتخلص المحاضرة بعد ما يكون كروت 50 صفحة وإلّي مشرحش منهم غير صفحتين إلّي هما بتوع الفهرس .



6- الدكتور إلّي منهجه عشر صفحات .


والدكتور ده بييجي كل يوم يصبّح على الطلبة ويروح علطول ... ولو الحماسة خدته وقرر يشرح عشان يلحق يخلص المنهج أبو عشر صفحات ده ... تلاقيه دخل المحاضرة وقال ( صباح الخير ... إزيكو يا أولادي الاعزاء .. إنهارضه هناخد ..هناخد .... ولا أقولوكو ... نلتقي في المحاضرة القادمة إن شاء الله ... السلام عليكم )



7- الدكتور إلّي بيعلّم الإمتحانات بالشبر .


والدكتور ده غالبا الإمتحان بتاعه بيبقى دش فمش هيبقى فاضى يقرأ كل الكلام المكتوب في ورقة الإجابة .. فأنا لو منه الصراحة هعلّم الإمتحان بأحد الطريقتين دول :

- الطريقة الاولى ( الطريقة الهندسية ) : هجيب مسطرة وأعمل خط عمودي على يمين الصفحة بيمس أطراف الإجابة ... وكذلك من الشمال ... وبعد كده أوصل الخطين من فوق ومن تحت بحيث إن كل الإجابة تكون محصورة جوه المستطيل ده ... وبعد كده أحسب محيط المستطيل ده ... وكل ما يكون المحيط أكبر كل ما تكون الدرجة أعلى .

- الطريقة التانية ( طريقة العد ) : أعد الكلمات الموجودة في أول سطر والكلمات الموجودة في أول عمود وأضربهم في بعض والناتج بتاعهم هيعبّر عن متوسط عدد كلمات الإجابة ... وكل ما تكون الإجابة أكبر كل ما التقدير يزيد .



8- الدكتور إلّي كله بيجيب معاه جيد جدا .


كل الإجابات عنده صح وتستحق التقدير ... يعني الطالب إلّي تواضع وكتب السؤال في ورقة الإجابة ونسي يحط الإجابة ... فالطالب ده لازم يكرّم من الدكتور وياخد على الأقل نص الدرجة ...لأنه بذل مجهود خرافي في نقل السؤال... والله يكون في عون الطالب هو هيلاحق على كتابة الأسئلة والأجوبة كمان ..

أي حد بيجيب معاه جيد جدا ... حتى لو إبنه الصغير إلّي في تالته إبتدائي حل إمتحانه ... والدكتور علّم ورقته من غير ما يعرف إن إبنه هو إلي حل هيديله أقل حاجة جيد جدا .



9- دكتور الحواديت والمغامرات .


والدكتور ده بيضيع 80 % من المحاضرة بالحواديت بتاعته لما خد الدكتوراه من أمريكا اللاتينية ... و لما كان بيعد هو وآينشتاين مع بعض على نفس القهوة ... وإزاي إن آينشتاين سرق منه القانون بتاع النسبية ...
ده غير مغامراته في جامعات أوربا وأمريكا ... وإنه هناك ليه شهرة كبيرة أوي ... وده فكرني بدكتور كان بيدرسلنا من النوع ده كان بيحكيلنا مرة : كنت ماشي في بلد أوربية مع رئيس الدولة والناس عمالة تبصلنا بإستغراب ... وبعد كده واحد قرب مننا وسأل : مين إلي ماشي مع الدكتور حسين ده ؟



وطبعا أكيد فيه أنواع تانية كتير غير إلي مكتوبة . 




المواقع إلي نشرت فيها الموضوع


http://www.3gypt.com/vb/thread335606.html


http://mazika4ever.com/vb/t92050.html


http://www.masrawycafe.com/vb/showthread.php?t=91333&highlight=

تابع القراءة »