أنواع الناس اللي بتعلّق في الفيس
1-
أبو لينك .. وده بيبقى ساحب في ديل الماوس
بتاعه لينكات كتيرة .. بيرميها في أي صفحة
تقابله .. وأغلبيتها بتبقى اعلان لصفحته .. بيبقى عامل زي الناس اللي بتقف أدام
الجوامع بعد صلاة الجمعة بتوزع ورق إعلانات لمحل هيفتح جديد .
2-
الخنيق .. مفيش أي بوست بيعجبه .. بيكرّه
الادمن في حياته من كمية الإحباط اللي بيحبطه بيها .. تعليقاته مبتخرجش عن الكلمات
دي .. قديمة .. بايخة .. بيض .. إلخ .
3-
الشتّام .. 90 % من كلامه شتيمة .. حتى لو
بيشكر الأدمن على البوست .. (بوست فشيخ يا ابن ال ... ) .
4-
المبسوط .. وده بيبقى واد فريش .. أي بوست
بيرضيه وبيبسطه .. معظم تعليقاته بتبقى .. (هههههههههههههههههههه .. لووووووووول
.. ملهاش حل .. مسخرة ).. وده بيبقى حبيب الأدمن .
5-
الهكر .. وده بقى منتشر بطريقة كبيرة ..
وأشهر طريقة بتاعة مهندس الإتصالات اللي اخترق التلات شبكات وبيوزع كروت مجانا ..وآخر
كلام سمعته عن المهندس ده إنهم هيسفّروه بعثة لأمريكا يمسك هناك مدير المخابرات .
6-
العصبي .. دايما تلاقيه بيتخانق وصوته جايب
لآخر الفيس .. وبيبقى هاين عليه يطلع من أم البروفايل بتاعه يمسك أي حد في الصفحة
يجرجره فيها ويفرّج عليه كل الميمبر .. مبيصدق يلاقى حد مختلف معاه ويبتدي يدخل
معاه في خناقة .
7-
بتاع المؤامرات : 6 ابريل عميلة .. البرادعى
بيهرّب اسلحة نووية للامريكان .. وائل غنيم المرشد الأعلى للماسونيين .. إلخ
8-
بتاع البنات .. بيعمل لايك لأي بنت حطّه صورة
حلوة .. واللي يفقع إنك تلاقى واحدة عامله تعليق (ههههههههههههههه) بس صورتها
حلوة شوية تلاقي عشر لايكات .
9-
اللي بيرد في نفس موضوع البوست .. وده بيبقى
عملة نادرة بالذات في الصفحات اللي فيها اعضاء كتير.. الأدمن يفضل يبص على الميت
كومينت اللي عنده .. وميلاقيش إلا عشرين واحد ردّين في نفس موضوع البوست .
