قبل ما أدخل في الموضوع .... أنا متخرج من كلية هندسة البترول والتعدين , والموضوع ده من واقع تجارب شخصية بعد التخرج .....
بعد ما عبود خلص دراسة في كلية الهندسة قرر إنه يبعت السي في بتاعه لكل شركات البترول والتعدين في مصر , وفي يوم وهوه آعد مأنتخ في البيت وآعد يكلم نفسه كالعادة ( وبعدين يا عبود ..... مفيش ولا شركه عندها نظر تتصل بيك ولا حتى تديك مسد كول ... ده أنا ياما صورت سيفيهات , وبعت إيميلات .... وحتى البريد السريع بعت عليه .... بس أكيد الحمام الزاجل إلي كانو بيبعتو معاه السي في بتاعي عالبريد السريع ... إنضرب ببندقية صيد .... أكيد دي مؤامرة ... الأوغاد إصطادو الحمامة , وخادو السي في بتاعي ولّعو بيه تحت الحلة إلي هيسلقو فيها الحمامة .... لا أنا مش هسكت .... عبود ميتقطعلوش سيفيهات ... ) وقبل ما يكمل كلامه كان تليفونه بيرن ........ فجري عالتلفون وهوه بيقول ( دول أكيد الأوغاد عاوزين فدية عشان يسيبو الحمامة تكمل طريقها .... بس وديني ما هيطولو مني ولا مليم) , وبعد ما رد طلع صوت واحد .
- - ألو الباشمهندس عبود معايا
- - أيوه أنا عبود .....مين معايا .
- -معاك شركة ( هنخليك عالحديدة ) .
- -نعم ! .......... ايه الفال المنيل ده ؟
- يا بشمهندس , شركة (هنخليك عالحديدة) بترحب بحضرتك , وتتشرف إنك تكون واحد من مهندسيها .
- - بذمتك ده اسم شركة محترمة عشان اشتغل فيها .
- -اصبر يا بشمهندس , في واحد من اصحابك بعت السي في بتاعك على شركتنا واحنا قريناه كويس , ومستنيين حضرتك عشان تعمل الانتر فيو .
- -طب اصبر عليا حتى لما اعرف مكان الشركة ولا أسئل عليها .
- - اطمن يا بشمهندس الشركة بتاعتنا فول أوبشن وبتدي مرتبات مش بطالة .
- - كم يعني ؟
- - حضرتك هتعرف كل حاجة لما تيجي , احنا في انتظارك .
وأعد عبود يفكر مع نفسه وقال مفيش مشاكل , نروح ونجرب , وربنا يستر ومتبقاش آخرتنا على اسم الشركة .
وأعد عبود يفكر مع نفسه وقال مفيش مشاكل , نروح ونجرب , وربنا يستر ومتبقاش آخرتنا على اسم الشركة .
وأعد عبود يدور علي حاجة كده يلبسها عشان يلعلط في الانتر فيو , فنزل الوكالة جاب قميص مستعمل بس استعمال نضيف , فمحدش لبسه غير عم مشكاح وعياله الاربعة واخواته بس , أما البنطلون فاستلف الرجل اليمين من عند خاله أما الشمال فجابها من عند عمه ( وبعدين عمل للبنطلون لحام , ولحم الرجلين مع بعض )
وراح ضارب الطقم ولبس عليه جاكتة , وبعدين اتصل على واحد صاحبه وراح معاه للشركة.
أول ما وصلو لمكان الشركة .......... أعدو الاتنين يبصوا لبعض باستغراب.
عبود : ولا .......... هي دي الشركة !
- انت مش شايف اليافطة قدامك ( شركة هنخليك عالحديدة لانتاج الحديد المصدي ) .
- يا عم أكيد احنا غلطنا في الطريق ......... دي لايمكن تكون شركة , . دول حاطين قفل بتاع عجلة عالبوابة .
- ما جايز القفل بتاع عجلة صاحب الشركة .
- وبعدين هوه مفيش حد هنا ولا إيه ؟
وقبل ما يكمل عبود كلمته , جيه واحد من جوه لابس جلابية وهو بيشاور على عبود وزميله وبيزعق : يلا جدع منك ليه من هنا .......... روح إلعب بعيد يا شاطر .
عبود : ايه يا عم انت , احنا عندنا مقابلة في الشركة هنا .
الراجل : آه ..... انتو إلي جايين تشتغلو فراشين ؟ .......... البيه كان علطول بيقول إن عنده عجز في الفراشين .
عبود : نعم ! ........... فراشين ايه يا عم , احنا مهندسين .
الراجل وهوه بيضحك : انتو مهندسين ............ عليا النعمة انتو فراشين , يا أستاذ انت مكسوف ليه تقول انك جاي تشتغل فراش ......... ما كلنا ولاد تسعة .
عبود وهوه جايب آخره : بقولك ايه ......... عاوزين ندخل , عشان عندنا مقابلة جوه .
الراجل وهوه بيضرب كف على كف : والله عشنا وشفنا الفراشين بيعملو مقابلات ............... لحظة لما اتصل بالاستاذ حسين عشان تدخلو ليه .
الراجل : ايوة ازيك يا استاذ حسين , في اتنين عالبوابة , بيقولو عندهم مقابلة
- آه دول مهندسين جايين يقدمو في الشركة دخلهم حالا .
- طب هدخلهم حالا ........... سلام .
الراجل ووشه أحمر من الكسوف : أنا آسف كنت فاكركو فراشين , بس طلعتو مهندسين ............... بس عليا النعمة شكلكو ميجبش إلا فراشين هههه.
عبود يبص لزميله وهوه بيقوله : يلا يا عم من هنا .......... عشان لو مسكت الراجل ده هبطحه بأي حتة حديدة من الحديد إلي مترمي هناك ده .
وعدو من البوابة جوه الشركة إلّي كانت عبارة عن أرض فاضية مرمي فيها كمية كبيرة من أسياخ الحديد المصدي , مع وجود مبني من دورين في وسط الشركة يبدو من شكله إنه جاد فعلا إنه يقع فوق دماغ الناس إلي فيه ...... وعلى الرغم من أن عبود حذر صاحبه إنهم يدخلو جوه المبني ده .... إلا إن صاحبه طمنه إن لو المبنى وقع عليهم .... هيموتو شهداء ... وغير كده أهاليهم هتاخد تعويضات أكتر من المرتبات إلي الشركة كانت هتديهالهم خلال ميه وعشرين سنة ..... ده غير الميادين إلي هتتعمل بإسمهم زي ( ميدان الشهيد عبود ) وغيره .... وفعلا إقتنع عبود بكلام صاحبه .... ومع إيمان عبود العالي وإقتناعه إن العمر واحد والرب واحد .... دخل بكل ثقة هو وصاحبه جوه المبني عشان يعملو الإنترفيو .
ودخل عبود وصاحبه الشركة , وأول ما وصلو قدمو نفسهم للسكرتير : أنا عبود , وده صاحبي أحمد .
السكرتير :طب اتفضلو , كل واحد ياخد ابليكيشن يملاه .......... على ما ييجي دوره في الانترفيو .
ياخد عبود الابليكيشن هو وزميله ويبتدو يملوه ...........
عبود وهو بيملا الأبلكيشن ....... الاسم بالكامل : عبود عباده عابدين .
تاريخ الميلاد : .............
لغاية ما وصل لفقرة المرتب المطلوب ......... فبص لزميله وقاله : ولا يا أحمد أكتب ايه في الفقرة دي ؟
أحمد وهو متنرفز : يا عم اكتب إلي تكتبه .......... وسيبني في حالي .
- ايه يا عم انت شكلك زي ما يكون في امتحان آخر السنة كده ليه ؟ ....... ده مجرد ابلكيشن .
- ما أنا مش عارف أحل حاجة ...... الاسئلة دي مخدناش زيها قبل كده ........و أنا كنت متعود في الكلية أصم الاسئلة بالاجابات بتاعتها .
- طب خلاص... قولي السؤال إلي مش عارف تجاوبه , وأنا أغششهولك .
- السؤال بتاع الخبرات السابقة ده أكتب فيه ايه ؟
- يعني لو كان ليك سابقة في أي شغلانة قبل كده اكتبها ........... أو أي تدريب خدته في أي شركة برضه اكتبه .
- لا للأسف لسه مبقتش سوابق , بس أكيد هبقى , لما أشتغل وأخربلهم المصنع ........ ساعتها هبقى سوابق بحق وحقيقي ........ ده بالنسبة للشغل , بالنسبة بقى للتدريب , الشركة إلي كنت المفروض أتدرب فيها شهر .......... المهندس هناك قالنا كفاية عليكو 5 أيام ........... يوم نتعرف عليكو ........... ويومين تتفرجوا عالمكن إلي في المصنع .
- واليومين الباقيين ؟
- خدناهم أجازة .
- خلاص اكتب التدريب ده في الابلكيشن ............. مش خدت من الشركة شهادة ؟
- آه ......... شهادة تشهد إني كنت ملتزم بالحضور يوميا لمدة شهر , ولم اتغيب ولا يوم ............... حتي واخد امتياز في الشهادة .......... إلي عمري ماعملتها في الكلية .
- طب يا سيدي , محتاج إجابة على أي سؤال تاني , ولا نروح نسلم الأبلكيشن .
- لا .......... تقريبا كده كله تمام .
وقبل ما يكمل كلامه ........... الموظف نادى على عبود ( عبود عبادة عابدين ............ اتفضل عشان الانترفيو )
ويبص عبود لزميله قبل ما يدخل ويوصيه : ادعيلي كده عشان ربنا يكرمني .
أحمد : متقلقش يا عبود .......... وخير إن شاءالله .
ويدخل عبود الانترفيو وهو بيقرأ آية الكرسي عشان أعصابه تهدى شوية .
ويستقبله الراجل إلي هيعملو الانترفيو وهو بيقول : اتفضل ......... اتفضل يا بشمهندس .............. عاوزك تاخد راحتك على الآآآآآآآآآخر .
ومسك الراجل السي في بتاع عبود في ايده وأعد يقرا منه شوية حاجات بصوت مسموع ( الاسم عبود عبادة عابدين ........... ههههههههه اسمك نكتة أوي يا عبود ....... كله عينات هههههههههههه ............ وانفجر الراجل في الضحك )......... وبعد ما خلص ضحك , بص لعبود وقاله أوعى تزعل مني يا عبود , أصل أنا لما بضحك محدش بيعرف يفصلني .
عبود في سره : اخلص يا عم المبسوط ..... دا انت لسه هتتضحك ضحك لما تسألني عن أي حاجة في القسم .
ومسك الراجل السي في بتاع عبود تاني , لكن المرة دي كان وشه باين عليه الجدية والاندماج مع السي في .......... وشوية كده وراح الراجل شايل عينه من على السي في , وبص لعبود وقاله : ولا قولي يا عبود , هو انت و إنت صغير مكنش نفسك تطلع حاجة غير مهندس ؟
عبود : آه أنا أصلا كان نفسي أطلع ميكانيكي ......... لولا بقى الحاج والدي نصحني وعرفني إني لازم أدخل كليه محترمة و قالي يا عبود يابني احنا عيلتنا عندها عجز في المهندسين , فدخلت الهندسة عشان أسد العجز ده ........ الله يمسيك بالخير يا أبويا , دخلت الهندسة من هنا ........ واتخرجت وبقيت عاجز عن العمل .
الراجل يكمل أسئلته لعبود : بص يا سيدي ......... هنفترض مثلا إن احنا تواضعنا وشغلناك في الشركة عندنا , وشفت واحد زميلك في الشغل بيغلط في شغله , هتتصرف إزاي ؟
أعد عبود يفكر شوية وبعدين قال : لو زميلي أوي هنصحه ......... لو مقبلش النصيحة ............. هنصحه كمان مرة ...........لو مقبلش بقى في تاني مرة ههدده إني أبلغ المسؤول ............ لو ما اتعظش هروح أبلغ المسؤول .................... أما لو مش زميلي أوي هروح أبلغ عنه , حتى من قبل ما يغلط ( الاحتياط واجب يا باشا ) ............... وبعدين أنا لو سبته يبوظ في شغله يبقى أنا كده متواطأ معاه ............ وبعدين هو فاكر إن فلوس الشركة دي مال سايب , ميعرفش إن إلي شغالين في الشركة على ما يطلعو سيخ حديد بيطلع عنيهم ؟ ...........وعلى العموم متقلقش يا باشا انت وراك رجاله , شغلني بس وأنا هبلغلك عن كل إلي شغالين معايا .
الراجل : ماشي يا عبود .......... أنا شايف في السي في بتاعك إنك واخد دورات إنجليزي .......... ايه أخبار الإنجليزي معاك ؟
عبود : طبعا ياباشا , دأنت لو بعتني انجلترا , الانجليز إلي هناك هيتلخبطو بيني وبين أهل البلد .
الراجل : طب عظيم قوي يا عبود ............ قولي بقى لو اشتغلت معانا وبعد ما استقريت في الشغل كده , جيت شركة تانية وعرضت عليك شغل معاها بمرتب أكبر ............. هل هتسيب شركتنا يا عبود ؟ بعد ما اتعودنا عليك , وبقيت واحد مننا ...... وبعد ما حبيناك , وكلنا مع بعض عيش وملح , وبعد ما اعتبرناك عمود من عواميد الشركة ......... هل بعد كل ده هتسيبنا يا عبود ؟ إهئ إهئ ....
عبود وهو متأثر : خلاص , خلاص , أنا كده هيعيط ........... طبعا هرمي استقالتي لشركتكو , وأروح الشركة التانية دي إلي بتقدرني وإلي هتديني مرتب أكتر من عندكو ........ ومتقلقش يا باشا هبقى أشوفلك شغلانة في الشركة دي بمرتب أكبر من مرتبك .
الراجل وهو مبسوط : بجد يا عبود ! ............ أبوس إيدك يا عبود أوعى تنساني .
عبود وهو متأنزح وحاطط رجل على رجل : خلاص .... خلاص , أنا هبقى أسيبلك الكارت بتاعي عليه كل موبايلاتي ....... وأبقى اتصل بيا في أي وقت .
الراجل : بص يا عبود بقى عشان ننهي الانتر فيو ده ........
عبود مقاطعا : ايه ده , هو أنت مش هتسألني في أي حاجة في القسم بتاعي ؟
الراجل : مش ضروري , مش ضروري .
عبود : نعم , هو أنا هشتغل ايه بالظبط ؟
الراجل : هتشتغل في المبيعات .
عبود : مبيعات ! ......... أنا خريج هندسة .
الراجل : وما له , مش بتفهم في الحديد ؟....... يبقى هنحتاج واحد بيفهم في الحديد عشان يعرف يصرفلنا المنتجات بتاعتنا .
عبود : يا خسارة خمس سنين فيكي يا كلية .
0 التعليقات:
إرسال تعليق