مش لازم تفتح الحنفية عالآخر ..

الميه نعمة كبيرة ربنا أنعم بيها علينا ... فلازم نحافظ عليها ومنحاولش نهدرها ببعض السلوكيات الغير المسؤولة  وخصوصا إن السنين الجاية هتشهد إنخفاض كمية المية المتاحة لينا ... فممكن بشوية إجراءات بسيطة نقلل من إهدار الميه إلّي أهم مظاهرها :

-         الناس إلي بترش ميه أدام بيتها عشان التراب ... وياريته ماسك صفيحة وبيرش منها , لأ ده بيجيب خرطوم طوله تلاته كيلو مربوط في حنفية غالبا الجلدة بتاعتها بايظة ... وإتفرج بقى على كمية المية المهدرة , يعني لو خدت الخرطوم ده من الراجل إلي بيرش , ممكن تملى بيه كام ترعة على كام بيسين .

وطبعا محدش هيقول للراجل إلي بيرش , إنت بتعمل إيه ؟ ... الخرطوم وشاريه من حر ماله  ... والميه إلي بيرشها برضه طالعة من الحنفية بتاعته ... والراجل الصراحة مش مقصر .. كل شهرين بيروح يدفع فاتورة المية بتاعته ومعلهوش أي فواتير متأخرة .... لكن المشكلة إلّي هو مش واخد باله منها إنه أهدر كمية كبيرة من المية .

-         حاجة تانية ... فيه ناس بتتعامل مع الحنفية كعدو لدود ... فلما تيجي تفتح الحنفية متفتحهاش عشان تنزل سرسوب ولّا سرسوبين .. لا دي بتتخانق مع الحنفية وتفتحها على الآخر عشان تنزل بدل السرسوب عشر سراسيب ... وأنا من موقعي هذا بأطالب الحكومة بفرض عقوبة على المواطن إلي بيفتح الحنفية بمقدار أكتر من تلات سراسيب , بواقع 5 جنيه لكل سرسوب زيادة .

 يعني بجد يا ريت الناس لما تفتح الحنفية , تفتحها على القدر إلي هتستخدمها   بيه , مش لازم نشوف شلالات نازلة من الحنفية ... والكلام طبعا لربات البيوت , لما ييجو يغسلو المواعين ... مش لازم الحنفية تفضل مفتوحة طول ما إنتي بتغسلي بليفة المواعين ... ممكن تغسلي الأول كل الاطباق وبعدين في الآخر خالص تفتحي الحنفية وتشطفي المواعين كلها ( ودي طريقتي المفضلة في غسل المواعين )

وطبعا الكلام ينطبق على بعض الناس إلي بتتوضى في المساجد ... ففي ناس بتفتكر إن ثواب الوضوء بيكتر كل ما الحنفية تتفتح أكتر ... وكل ما تغرق الناس إلي بتتوضى جنبك كل ما بقيت رجل أكثر إيمانا وورعا ... وياريت كمان الواحد ييجي من غير حمى , فهو هيقوم باللازم ويحَمّيك بالمية إلي بيطرطشها عليك وهو بيتوضا .

-         حاجة كمان بتعمل على إهدار الميه ... الحنفيات إلي جلدتها بايظة .... تك  تك  تك  تك   ( ده صوت قطرات الميه نازله من حنفية بايظة ... وغير إن صوت القطرات دي صوت مزعج جدا وممكن يستخدم كوسيلة فعالة في التعذيب , كمان كمية المية المهدرة من الحنفيات دي بتكون كتييرة ) ... فمش هتخسر حاجة لما تروح تنادي على عم حسن السباك عشان يصلحهالك ... ولو يا سيدي مابتحبش السباكين إقفل المحبس وما تفتحوش إلا لما تستخدم الحنفية .

-          الحاجة بقى إلّي أعتقد إنها أكتر حاجة بتهدر في الميه هي الحمى ... يعني خد عندك خمس دقايق الحنفية بتتفتح عشان تظبط الميه وتخليها دافية , ودي فعلا عملية مرهقة جدا ( وبالذات لما يكون عندك سخان غاز رخم ... تفتح البارد الميه تلج ... خلاص إفتح السخن .... يحصل إشعال ذاتي ويشتغل السخان  .... هيييييييه السخان إشتغل ... تحط إيدك عشان تشوف الميه ... طبعا هترقع بالصوت عشان الميه مغليه ... زود الميه الباردة .. حط إيدك .. إشطة الميه دافية ... شغل الدش ... السخان يفصل ... وبعدين بقى ؟ ... يعني يا إما الواحد يستحمى ببخار ميه , يا إما الدش يحدف عليه حتت تلج ... لكن لأن الصبر هو مفتاح الفرج فبعد مرور مدة كبيرة تتحقق المعجزة ويطلع من الحنفية ميه دافية ) ... بعدها يبدأ الدور الإستراتيجي للدُش ... وده فترته بتتراوح من عشر دقايق إلي مالانهاية ... يعني فيه ناس معندهاش مانع إنها تقضي تلات تيام تحت الدش ....... أصل الدش ليه جاذبية كبيرة وصعب مقاومتها ..... أنا عارف إن فترة - تحت الدش - هي من أجمل الفترات إلي الواحد يمكن يقضيها في حياته ... بس برضه لازم تعمل حساب للكمية الكبيرة المهدرة من كل مرة تستحمى فيها .

سؤال أخير ... بتعمل إيه لما الميه بتكون مقطوعة ومفيش عندك غير جركن ميه واحد بس ؟ .... الإجابة المنطقية إنك هتستغل كل نقطة ميه في الجركن وطبعا مش هتهدر ولا نقطة منه .... ياريت بقى نتعامل مع الميه زي ما نكون مش معانا غير جركن واحد بس .