بلاغ للنائب العام ..
Posted by محمد عيسى on الأربعاء, فبراير 16, 2011
- رايح مشوار .
- مشوار إيه ده ؟
- رايح للنائب العام .
- يالهوي... النائب العام ... عملت إيه يا راجل ... إعترف .. سرقت بنك ولا نهبت اراضي الدولة يا مختلس , ولّا تكون مشارك عز في الدخيلة .... إعترف ليك كم سهم في الدخيلة ؟
- اتكتمي ياولية ... أراضي إيه وكم سهم إيه ؟! .... إنت عارفه أنا رايح ليه اساسا ؟
- أكيدعشان يحاكموك ... ما أكيد إنت إلي أعدت تزن على دماغ عز عشان يحتكر الحديد ويرفع سعره ..
- إنت إنهبلتي ياولية .. حديد إيه وإحتكار إيه ؟! ... أنا كل علاقتي بالحديد إني عالحديدة.... وبعدين إنتي عارفه أنا رايح أبلغ عن مين ؟ .... أنا رايح ابلغ عن محسن أبو دومة .
- أبو دومة جارنا ؟
- ايوه
- بقى أبو دومة هو إلي شريكك مش عز ... ده انتوعاملين عصابة بقى وأنا مش دريانة .
- إنت يا ولية عاوزة تجننيني ... أنا مش شريك حد ... أنا سمعت إن ابو دومة عنده فلوس في بنوك سويسرا ... ده غير العقارات إلي شاريها في لندن وباريس .... ده بيقولو إن ثروته حوالي 500 مليون دولار .
- يالهوي... خمسوميت مليون دولار ! .... هو إيه المليون ده ؟ ... ويعني إيه دولار ؟
- هبسّطهالك يا ستي ... المليون ده إلّي هو لما يكون واحد معاه مليار جنيه ويروح للبقال ويقوله معاك فكة مليار ... فيقوم البقال يفكهوله بألف مليون ... هو ده بقى المليون .
- آه فهمت ... طب والدولار ؟
- الدولار عبارة عن حركة إنفصالية منشقّه عن الجنيه ... يعني كل خمسة جنيه وتمانين قرش بينشقو ويغيرو إسمهم الطويل اوي ده و بيختصرو الإسم ويسمو نفسهم دولار ..
- أيوه كده أنا فهمت ..... إنت لازم يا اخويا تبلغ عن الراجل ده ... إحنا لازم نحارب إلي عاوزين يعملو حركات إنفصالية دول ... هي البلد ناقصة .
- لما نشوف يا ابودومة هتعرف تتهني إزاي بملايينك دي يا حرامي .
- لأ والولية مراته دايما مدّعية الفقر ... ولا يبان عليها إنها معاها فلوس أد كده ...وعيالها يا اخويا ... تجيب لهم التلات عيال سندوتش واحد وهما رايحيين المدرسة ...كل واحد يأطم أطمة ويدي باقي السندوتش لأخوه ......... بقولك إيه يا مجدي ما تخدني معاك للنائب العام ده .
- هوأنا رايح اتفسح يا ولية ... أنا رايح أبلغ عن جريمة كبيرة .
ياخد مجدي بعضه ويروح للنائب العام ... وهو طالع من البيت يقابله ابو دومة .. فيعمل نفسه مش شايفه ويتحرك بسرعة ... لكنه ينادي عليه ويقوله : يا استاذ مجدي ... كنت عاوزك في كلمتين كده .
مجدي: طب بسرعة بس عشان مستعجل .
أبودومة : بقى ياراجل نكون ساكنين اصاد بعض من عشرين سنة ويطلع منك كل ده .
حس مجدي إن ابودومة عرف إنه رايح يبلغ عنه فرد وهو مرتبك : يطلع مني إيه مش فاهم .
أبودومة : لا مكنش العشم يا استاذ مجدي ... أنا كنت بحسب إن إحنا جيران بجد وسري هو سرك .
مجدي: سر إيه يا أبو دومة .
أبودومة في تحدي : مش عارف سر إيه ؟ .... طب عليا النعمة ما انا معديهالك المرة دي... وبعد إذنك بقى عشان عندي مشوار مهم .... ( وياخد بعضه ويمشي بسرعة ) .
يقف مجدي يفكر شوية وحاول يرجع في كلامه وميرحش يبلغ عن أبو دومة ... لكن ضميره يصحي ويقوله بصوت حازم : وبعدين معاك يا مجدي ... هما البوقين إلي قالهوملك أبودومة دول خوفوك .... إنت عمرك ماكنت جبان ... إنت نسيت لما حاربت في 6 اكتوبر ... والطيارات بتاعة العدو لما كانو يعرفو إن تحتهم مجدي أبو ليلة ... كانو بياخدو أول ملف ويرجعوإسرائيل تاني ... ولا الرصاص إلي كان بينضرب عليك من الجيش الإسرائيلي وأول ماالرصاصة تعرف إنها رايحة على مجدي أبوليلة ... تضرب فرملة وتقع على الارض قبل ما تخبط فيك ... نسيت كل ده... روح بلغ عنه ومتخافش من حد .
وفعلا قرر مجدي أخيرا إنه يروح للنائب العام ... أول ما وصل ادام المبني لقى أدامه ابو دومة.
مجدي: أبو دومة ! ... إنت إيه إلي جابك هنا ؟
ابودومة: مفيش ... مفيش
مجدي: خد تعالى ... تعالى ... إنت كنت عاوز تعملي كمين عشان ما بلغش عنك ؟
أبودومة : كمين إيه ؟! .... وتبلغ عني ليه أصلا ... أنا مش فاهم حاجة ... دأنا إلي كنت جاي ابلغ عنك .
مجدي: تبلغ عني ؟!
أبودومة : آه مش أنا كنت بعاتبك الصبح .
مجدي: آه ... بس أنا فكرتك بتعاتبني عشان عرفت إني هبلغ عليك .
أبودومة: لا ... ده كنت بعاتبك على حاجة تانية ... بقى ياراجل بقالنا عشرين سنة جيران ومعرفش إن معاك ملايين في بنوك سويسرا ... ولا مرة كده ترش على اهل حتتك كام مليون... إخص عليك إخص .
مجدي: بقى هي الحكاية كده ... طب يلا بينا إحنا الإتنين على النائب العام .
تمت
المواقع إلي نشرت فيها الموضوع
http://www.haridy.com/ib3/topic/1880-بلاغ-للنائب-العام/
http://maghnesium.com/forum/showthread.php?t=3459
http://www.3gypt.com/vb/thread347690.html
