تعالو نشوف إزاي ممكن يبقى عندنا نفس المشكلة .. لكن كل واحد فينا بيعبر عنها حسب شخصيته ... هنفترض مثلا إن فيه موظفين في شركة بيقبضو نفس المرتب وكل واحد فيهم بعت شكوي لرئيس مجلس الإدارة عشان يزودله المرتب ... يا ترى الشكاوي دي شكلها هيبقى عامل إزاي ؟
المتكبر : إنت يا مدير إنت ... ال 400 جنيه إلي بقبضهم كل شهر يجيلي ضعفهم بعد كده ..
العصبي : إنت يا إللي عاملي فيها رئيس مجلس الإدارة ... أيوه إنت بكلمك ... بص بقى ... إحنا إتخنقنا منكو ومن مرتباتكو ... ال 400 ملطوش إلي بيترمولنا آخر الشهر مبيكفوش عيش حاف ... دي بقت عيشة تقرف ... يا ريت بقى أم المرتب ده يزيد عشان نعرف نعيش زي مخاليق ربنا .. ده أنتو كفرتونا يا جدع ... اوعى كده .
الرومانسي : حبيبي رئيس مجلس الإدارة ... أكتب لك من أعماق قلبي وأنا احترق شوقا لرؤياك كي أخبرك عن معاناتي مع مرتبي الذي لا يتعدى ال 400 جنيه ... أريد منك أن تحتضنني وتزيد من مرتبي ... لك قبلاتي وتحياتي .
المنظّم : المشكلة بتاعتي بتتلخص في 3 محاور
المعطيات : مرتبي 400 جنيه (1 )
النواتج : ال 400 جنيه مبيكفوش حاجة (2 )
الإستنتاج : من 1 , 2 نستنتج أن المرتب لازم يزيد .
المنافق : ورحمة الست الوالدة إنت أعظم رئيس مجلس إدارة حصل في أفريقيا ودول حوض البحر المتوسط ... إيه الحلاوة دي ... شياكة إيه ... وأدب إيه ؟ ... وأخلاق إيه ؟ ... ولّا الكرم .. يا لهوي على كرم معاليك .. الميت جنيه في جيب سعادتك مبتستناش ... أول ما تشوف حد محتاجها تنط من جيبك على إيده علطول .... ربنا يزيدك يا بيه ... ويزيدك أكتر لما تزودلنا ال 400 جنيه .
المتشائم : أنا خلاص مستقبلي بيضيع يا بيه ... ولادي هيتشردو في الشوارع ... ومراتي هتخلعني وتتجوز واحد ملياردير من بتوع اليومين دول ... وانا خلاص هضيع ... هضييييييع ... إلحقني يابيه وزودلي المرتب قبل ما مراتي تروح للمحامي عشان تخلعني .
الثورجي : لقد ولدتنا أمهاتنا أحرارا ... ولن نستعبد في هذه الشركة بعد اليوم ... إن ال 400 جنيه التي تستعبدوننا بها في هذه الشركة ... ما هي إلا فتات الفتات ... فأنتم تأكلون الفراخ واللحوم المشوية ونحن لا نجد إلا الفول والطعمية ... اللعنة عليكم جميعا ... إلي الامام ... إلي الامام ... ثورة .. ثورة
الفضولي : يا مدير ... المرتب بتاعي 400 جنيه ... يا ترى بقى مرتب سيادتك كام ... لا بجد هو انت بتاخد كام ؟ ... قول قول ما تخافش مش هقول لحد ... طب هسيبلك فراغ عشان تكتبلي فيه مرتبك ( ....... ) .. نرجع تاني لموضوعنا ... ياترى بقى ال 400 جنيه لما يزيدو هيبقو كام ؟ ( ......... )
الغامض : بالنسبة يا ريس للموضوع إيّاه ... ما انت اكيد عارفه ... أكيد س ولّا ص من معارفك قالك عليه ... عاوزينه بقى يزيد .. زوّد على أد ما تقدر ... عالآآآآآخر .. لو إدّلدق ما يهمكش ... وكمان عاوزينه بدل ما كان أد كده ... يبقى آاااااااد كده
الحاقد : بقى يا كفرة إنتو بتقبضو أد كده على قلبكو كل شهر وإحنا مش لاقيين ناكل ... الله يحرقكو كلكو ونشوف فيكو يوم إسود إنتو وكل موظف بياخد أكتر من 400 جنيه في الشهر ... إلهي كل واحد بيقبض اكتر من 400 جنيه في الشهر كل مرتبه يضيع وما يتباقلوش غير 400 جنيه .
الزنّان : يا مدير ... يا مدير ... يا مدير ..... زودلنا المرتب بقى يا مدير ... زودو ... ماشي ؟... ماشى ؟ .... ما انت عارف ال 400 جنيه مبيعملوش حاجة في الشهر .... خلاص وافقت .. مش كده ؟ ... عليا النعمة موافق ... صح ... صح ؟
الندل : أنا مستعد يابيه أبلغ عن أي زميل ليّا عاوز يشارك في أي إضراب عشان يزود مرتبه ... بشرط تزودولي مرتبي .
