صباح الخير يا جريمة

هو ليه الجرائم انتشرت في المجتمع بشكل مخيف؟ , لدرجة إنك صعب تجيب جرنال , وما تلاقيش فيه أخبار الحوادث يوميا , وكمان ياريت أسباب الجرائم دي مقنعة ......... دي أسباب أكترها تافهة , يعني خد كام مثال على الجرائم إلي ممكن تقرأها في الجرنال .


( يغز أعز اصدقائه ......... لرفضه إعطائه الخمسة جنيه إلي عليه )

تلقى اللواء أحمد السلاموني رئيس مباحث المنطقة الفلانية بلاغا من السيد (ب . ت ) والد المجني عليه ( أ . ب . ت ) يخبره عن قيام المدعو( مشكاح غزو وريحه) بطعن نجله 21 طعنة في انحاء متفرقة في الجسم ........ وقد أمر السيد اللواء بارسال قوة لمكان الحادث لمعاينة الجريمة , وبسؤال أهالي المنطقة قال ( م . ع ) صاحب محل فول وطعمية: يا باشا الواد مشكاح هو وصاحبه كل يوم بيعدو على القهوة إلي جنب المطعم بتاعي ,ويوم الحادثة بقى ياباشا كنت في المطعم و كنت ماسك قرص طعمية ولسه جاي احطه في الطاسه , وقبل حتى ما تعمل تششش ( أي والله ياباشا .... ) سمعت صوت خناقة , قولت جايز الولا زنئر إلي شغال عندي في المطعم مشغل قناة (مولتي أكشن )......(.أصله بيلعب كاراتيه يا باشا ومعاه الحزام الابيض بس دهنه إسود), لكن لقيت الجهاز مطفي , فسألته قالي إن مشكاح بيتخانق مع صاحبه , وأنا بقى عشان راجل أصيل و مجدع وابن بلد و بحب أخدم و إلخ إلخ ........, رحت سايب قرص الطعمية وطفيت على إدرة الفول , وطلعت فريرة على بره عشان أشوف إلي حصل ........ وإذ فجأة لقيت الولا مشكاح مطلع خنجر وبيقول لصاحبه : وحياة تيت لو مجبتش الخمسة جنيه إلي عليك لكون مشرحك ........... وبعدين يا باشا صاحبه رد عليه : لو إنت مان كنت عملتها من زمان ......... أنا حاولت يا باشا أهدي الموضوع وقلت لمشكاح يخلي صاحبه يعزمه على كم ساندوتش فول على كم ساندوتش طعمية بالخمسة جنيه في المطعم بتاعي, لكنه رفض وقالي خليك انت يا أستاذ على جنب أنا عاوز خمستي مصححة مش ساندوشتات ......... وبعدين حصل إلي حصل يا باشا , ومشكاح قتل صاحبه.

(القبض على عصابة أشرف باكتة وبحوزتهم 2كيلو من الهيروين)

قامت الثلاثاء مصلحة الأمن العام بالاشتراك مع مديرية أمن المحافظة بشن حملة أمنية بالمنطقة الصحراوية لضبط الخارجين عن القانون والمتهمين الهاربين في قضايا مخدرات, حيث لاحظ العسكري (حمودة المستكاوي ) وجود سيارة ملاكي تقف بجوار سيارة ملاكي أخرى علي الطريق الصحراوي , فافتكر إنه شاف المشهد ده في فيلم ( جعلوني مدمنا ) لما البطل كان تاجر مخدرات وكان بيعمل صفقاته بالمنظر ده , فراح يبلغ الضابط عن شكه في حدوث عملية تهريب مخدرات , فأمر الضابط جميع القوات : إلى جميع القوات ....... إلي جميع القوات ..... كلو يتجه ناحية العربيتين الملاكي إلي على يمينكو ........... و شغل السارينة يا بني ...... ميصحش ندخل عليهم كده من غير إحم ولا دستور ( ويوا ويوا ويوا .......... ).

( حد ينزل هنا بموسيقى أكشن )

وعند محاولة القبض عليهم أخرجو (أر بي جي) وقاما بإطلاق أعيرة نارية تجاه القوات , ولكن القوات ردت عليهم بحدف كمية كبيرة من البمب , مما آثار هلعهم واضطرهم ترك سياراتهم والفلسعة في الصحراء , ولكن الضابط أشار لأحد عساكره ( حمودة المستكاوي برضه ) ليلحق بهم , لكنه اعترض وقال للضابط ( هوه مفيش غيري بقى يا باشا ......... مش كفاية إني دلتكو على مكان العربيات........ لا يا عم أنا مش هكمل معاكو) , فشخط فيه الضابط : إجري يا عسكري نفذ المطلوب ........ فانطلق حمودة ورائهم وقبض عليهم.

وبمعاينة العربيات الملاكي , اكتشفو وجود كيس بودرة , ومبلغ مالى كبير, وبعرض كيس البودرة علي الخبير ( فوزي خدلك نفس ) قال : الحكومة كانت باعتلنا كيس بودرة عشان نعرف إذا كان مخدرات ولا لأ ......... والأمانة تتقال........أي والله ........ يوميها عملت أحلاها دماغ , وشربت لغاية ما حسيت إني عصفورة وطاير لفوق ......... لفووووووووق , حتى لما الضابط سألني عملتو ايه , قولتله : بالله عليك يا باشا , إبقى اشكرلي الراجل أبو دماغ عالية إلي عمل البودرة دي ...... وكمان قولت للضابط : اطمن ياباشا , دي بودرة مخدرات وصنف أول كمان.
وبمواجهة المتهمين بالبودرة انكرو في البداية , وأصرو على أنها مجرد دقيق , ولكن بعد عرضهم على حنكش المفش , وسلطح أبو دراع .......... اعترف المتهمين بالجريمة , كما أضافا ان هذه المهنة مهنتهم أبا عن جد ......... وأنهم المسؤولين عن نصف عمليات التهريب التي تحدث في سيناء والصعيد وجميع الطرق الصحراوية.



(عزيزة تعترف بتقطيع زوجها 45 قطعة وإلقائه في ترعة بلدهم )

كشفت الشرطة الغموض عن حادث إختفاء (حسنين حسونة) , عند عثور أحد الفلاحين على كيس اسود بالترعة , والذي أسرع باخبار الشرطة عليه .
وقد بدأت القصة عندما بلغت عزيزة 16 عاما , وتهافت أهل القرية للزواج منها , فهي تمتلك من الجمال ما يجعل أي أخرس يراها يصيح بأعلى صوته ( يا بوووي ......ايه الجشطة دي) , ولكنها دائما ما كانت ترفض, منتظرة أن يأتيها حسونة ( حبها الأول والاخير ) والتي دائما ما كانت تقف يوميا على الترعة منتظرة أن يمر عليها راكبا حماره وجارا ورائه جموسته ومعيزه , وكانت دائما ما تنظر إليه على استحياء عندما يمر بجوارها في موكبه المهيب وسط نهيق حماره و مأمأة معيزه , وكانت تنتظر اليوم الذي يأتي ليتقدم لها ............ وبالفعل فقد تقدم حسونة لها , فهو أيضا كان يمر عليها يوميا ولم يخفى عليه نظراتها .............. وتم الزواج .

وتحكي عزيزة عن مابعد الزواج : بعد ما حسونة اتجوزني , اكتشفت إنو بخيل جلدة , فكان مبيرضاش يصرف عليا وكان فيه ايام ببات من غير عشا , وكمان كان كل يوم بيشتمني ........... لغاية ما في يوم قولت لنفسي يا بت يا عزيزة , انتي لازم تشوفيلك حل في الراجل ده ......... وطبعا كنت باسمع عن الزوجات إلي بيقتلو إجوازهم , فقلت في عقل بالي ( هما يعني الستات دول أحسن مني يعني........ طب ما اجرب حظي كده , ومش هخسر حاجة ) .

وفي يوم كان جاي من الشغل تعبان , فقولتله اعملك لمون يا حسونتي , قالي : طيب ............ أنا انتهزت الفرصة دي وطلعت سم الفيران إلي كنت شاحتاه من شكرية جارتنا إلي قتلت جوزها قبل كده , وكانت قايلالي على الوصفة عشان تخليه ما يفلفصش ويطب ساكت .

وبعد ما شرب اللمون وبلبعه كله , استنيت دقيقة ........ اتنين ...... تلاتة ..... ومحصلش حاجة ( بقى كده يا شكرية.......... قال عاملالي فيها سوابق ........ أمال لو مكنتيش مجربة الوصفة دي مع جوزك إلي قتلتيه ).

أنا قولت بقى جايز مفعول السم ياخد وقت , على ما الخلايا في بطن حسونة تتعرف علي السم , لكن الظاهر إن الصرف بتاع معدته بيطلع على المثانة على دورة الميه عدل ........... قولت خلاص هعمل معاه زي ما فتكات قريبتي عملت مع جوزها ( فبعد ما نام جبت الفاس وعلى دماغه ........ والحمد لله جابت نتيجة حلوة ....... وطلعت الاكياس البلاستيك , وجبت الساطور و قطعته حتت وعبيته في الاكياس , وبعدين رميته في الترعة ) .