3- الليلة عيد والعريس بيتجوز ( لحظات ما قبل الفرح)

العريس قاعد في البيت وكل شوية يتصل بالعروسة .

- ها عملتي ايه يا حياتي ........لبسوكي الفستان ولا هتيجي كاجوال ؟
- كاجوال! ........فشر دأنا هلبس أحلا فستان فيكي يا وكالة البلح .
- المهم , انت جاهزة دلوقتي , ولا هتلطعيني زي الخطوبة .
- عيب عليك يا مودي , أنا خلاص راكبة تكتك , ورايحة الكوافير أهوه.
- تكتك ! يا دي الفضايح , مش كفاية كنتي رايحة الكوافير في الخطوبة متشعبطة في الاتوبيس.

وبعد نص ساعة , يتصل تاني بالعروسة .

- ها عملتي ايه يا حياتي ......... وصلت الكوافير؟
- يعتبر وصلت , فاضلي شارعين وتقاطع وحارتين وزقاق وخمس مطبات وأبقى قدام الكوافير...... إدعيلي يا مودي أعرف أرقص انهارضه أصل التكتك قطم وسطي.
- خلاص , لما توصلي , ابقي رني عليا .
- طيب يا حبيبي , سلام بقى .

وبعد ساعة , يتصل بالعروسة .

- ها ايه الأخبار ؟ .........انت فين دلوقتي ؟
- أنا خلاص , لبست الفستان , والكوافيرة دلوقتي بتمكيجني .
- عايز أشوفك إنهارضة مزة , وأحلي واحدة في الفرح , مش عاوزين نبص لبره من أول يوم .
- متقلقش يا مودي , هخلي طوب الارض انهارضه يتغزل في جمالي.
- طوب الأرض , لا مش قوي كده .

وأخيرا بعد مرور ساعتين على آخر مكالمة , يرن تليفون العريس لمدة ربع ثانية , فيطلع التليفون ويبص عليه يلاقي نمرة العروسة ( أخيرا رنيتي ..... يا بروووووودك , سايباني ملطوع أربع ساعات ولسه فاكرة ترني دلوقتي , وكمان بتفي علية , خايفة أفتح عليكي............. ربنا يعدي الجوازة دي علي خير).

وأخيرا تنطلق السيارة بالعريس إلي الكوافير , وتصل السيارة , وتركب العروسة ,ويتحرك خلف السيارة موكب من السيارات الملاكي ويبدع كل سائق في الضغط علي الزمارة , فمنهم من يزمربمعدل تزميرتين كل ثانية , ومنهم من يزمرة تزميرة واحدة كل ثانية , ومنهم من ينشغل في سماع التزميرات الاخري وينسى أن يزمر.

وبعد ما يوصل موكب العربيات , ومعاه كم موتوسيكل وكم تكتك إلي شارع واسع , يبدأ الاستعراض .
حيث تتقدم أحد السيارات الفيات العريقة التي أكملت عامها الثلاثين , (والتي لم يمضي علي خروجها من عمرتها الخامسة بعد المائة الثالثة إلا يومين), يتبعها أبنائها من السيارات الشابة ( مرسيدس وميتسوبشي وتويوتا .........) ويكونوا جميعا حلقة دائرية , وتبدأ السيارات في السير بسرعة كبيرة , مخلفة ورائها عشرتلاف طن من الاتربة .

ويبدأ سائقي الموتسكلات في الظهور عنن عنن عننننننننننننننننننننن
إلي سايق بإيد واحدة .
وإلي سايق بصباع رجله الصغير.
وإلي فاضل علي موتوسكله جناحين ويشغله طيارة .
وإلي بيدرب موتوسكله عشان يخش بيه سباق كفر أبوعجوة للموتوسكلات.

وأخيرا يصل الموكب إلي مكان الفرح , ويبدأ أحد الشباب في إخراج صاروخ كبييييير , لكن يلمحه أحد أقارب العريس.
- ايه يابني ده , انت هتفجرلنا الفرح.
- يا عمي ده صاروخ إف 12 , كانو شغالين بيه في حرب 48.
- يعني مبيعورش.
- يعني لو كان بيعور كان اسرائيل احتلت فلسطين .
- طب اتكل علي الله يابني واضرب .

ويتم ضرب كمية كبيرة من الصواريخ والتي ملأت السماء وحولتها إلي ألوان الطيف, وبعدها يدخل العريس في يد عروسته إلي الكوشة ويبدأ الفرح.