- كتير من الطلبة بيدرسوا في كليات بعيد عن بلدهم عشان كده بيضطروا يعدو في المدينة الجامعية , أو يأجروا شقة , وفي كلتا الحالتين بتوفر المدينة الجامعية الغدا لأي طالب في الكلية التابع لها سواء كنت آعد في المدينة أو واخد شقة ,و مادام الحكاية فيها غدا , فالطابور بيكون غالبا زحمة , (يعني لو جيت تحسبها , في كليتنا مثلا كانو بيبيعو بون الأكل ب2جنيه للناس إلي مش ساكنة في المدينة ,فهتلاقيها أوفر بكتير من إنك تشتري أكل من بره ).
تعالو بقي نشوف طابور المدينة عامل ازاي , لما تختار الاجابة الصحيحة .
س : ايه الأسباب إلي خليتك تترمي في كلية بعيدة عن بلدك؟
1- يعني عاوزين نروش ونبعد عن خنقة البيت.
2- يا عم مش بإيدي , أنا جايب 30 % وبعد إضافة المستوي الرفيع يبقى 66% .
3- أعمل ايه بقى , الكلية مفيش زيها في البلد بحالها .
س : ساكن في المدينة الجامعية ولا مأجر شقة مفروشة يا نمس ؟
1- استغفر الله , شقة مفروشة ايه ياعم( انت هتشبهنا) أنا ساكن في المدينة في أوضة شرحة وبرحة , ومش ساكن معايا غير 7 انفار بس .
2- يا راجل حد يعد في المدينة , أنا مأجر شقة أنا وجماعة اصحابي .
3- كاتب اسمي في المدينة , بس بروح أبيت عند جماعة اصحابي في شقتهم وببلاش .
س : لما تروح تجيب الغدا من المدينة الجامعية , إيه إلي بيزعلك ؟
1- مفيش , الحياة حلوة ونحن نعيش أزهى عصور الديموقراطية .
2- الجماعة إلي قدامي كل واحد فيهم ماسك حوالي عشر بونات , وعلي ما ييجي دوري يكون معاد العشا جيه .
3- الطابور بيمشي لورا , وأي حد يعرف حد واقف في الطابور قدام بيخليه يجبله معاه .
4- الراجل إلي بيوزع الأكل بيحطلك عينات , ولو قولتلو زود الأكل يبصلك كأنك شتمته بأهله , ويقولك احنا ملتزمين بالقانون ( كل شحط فيكو ليه 123 حباية رز , و43,5 فيمتوجرام طبيخ , وحتة من الصدر أو الورك (لو فراخ ) , أو حتة لحمة مجمدة أبعادها 3 * 8* 0 ملم ).
س : طابور المدينة بيختلف عن أي طابور تاني بإيه ؟
1- مفيش , كلها طوابير ومفيهاش نظام .
2- فيه , معظم الواقفين معاك في الطابور في نفس كليتك , ومش بعيد إلي واقف وراك يخليك تشرحله المحاضرة بتاعة أول امبارح إلي معرفش يحضرها عشان كان عنده معاد مع البت بتاعته.
3- آخرة تعبك في وقفة طابور المدينة بتاخد جزائها فوري إنك هتتغدى , ومش بعيد الوجبة تكتم على أنفاسك وتوفر فلوس العشا .
طب ايه رأيك في طبيخنا ؟
1- عشرة علي عشرة, أنا حاسس إن الست الوالدة هي إلي طابخة .
2- هنعمل ايه , بنضطر ناكل عشان ما نموتش من الجوع.
3- باكله العصر , ورجعه بعد العشا .
س : عاوز تبعبع بأي حاجة تاني ؟
1- يا عم أنا مليش دعوة , كل حاجة ميه ميه .
2- زودو الوجبة شوية .
3- عاوزين نظام في الطابور .
4-عاوزين ناكل محشي ,وبلاش عصير العدس إلي بتعملوه ,ومش عاوزين المكرونة البرتقاني إلي مفيهاش صلصة دي .
0 التعليقات:
إرسال تعليق