الكلية بتاعتنا عملت النتيجة علي التليفون , يعني قبل ما تتعلق في الكلية بكام يوم بتظهر علي التليفون, والدقيقة بجنيه ونص , المشكلة بقي لما عرفت إنها بانت وجيت اتصل بيهم اكتشفت إنهم مستغلين .
أول ما اتصلت سمعت تسجيل صوتي لواحدة ست :السلام عليكم ورحمة الله وبركاته , دلوقتي تقدر تعرف نتيجتك ونتيجة إصحابك وقرايبك و زمايلك ونتيجة إلي تعرفه ونتيجة إلي متعرفوش .
( انجزي يا حجة الرصيد هيخلص )
آسفة عزيزي المتصل ,نسيت أقولك إن احنا هنجيبلك كل تقديراتك والدرجة الكلية كمان ( أي خدمة يا عم) نرجع بقي عزيزي المتصل لموضوعنا , إذا كنت في الكلية الفلانية اضغط الرقم 1 , إذا كنت في الكلية العلانية اضغط الرقم 2.........ولا أقولك اضغط الرقم 3,إذا كنت في كلية غير دول .............نسيت ....... آه خلاص افتكرت اضغط رقم 4 .أول ما اتصلت سمعت تسجيل صوتي لواحدة ست :السلام عليكم ورحمة الله وبركاته , دلوقتي تقدر تعرف نتيجتك ونتيجة إصحابك وقرايبك و زمايلك ونتيجة إلي تعرفه ونتيجة إلي متعرفوش .
( انجزي يا حجة الرصيد هيخلص )
(يلا أنا دوست أهو ,اخلصي بقي , عدي أكتر من دقيقتين ولسه معرفتش النتيجة)
هل أنت متأكد إن دي كليتك ............... فكر يابن الحلال جايز تكون ناسي , هديك عشر ثوان تراجع نفسك .
( والله العظيم متأكد, دأنا أعدت فيها خمس سنين , هي والله , يلا يا ستي ).
خلاص انت حر , لو إنت مش متأكد اضغط الرقم 1 , لو انت متأكد نص نص إضغط الرقم 2 , لو إنت متأكد خالص اضغط الرقم 3
( يا ستي متأكد وأدي الرقم 3 )
طيب عزيزي المتصل بما إنك مصر إن دي كليتك قولنا بقي إذا كنت في الفرقة الاعدادي اضغط الرقم 1 , إذا كنت في الفرقة الاولي اضغط الرقم 2 ..........إذا كنت في الفرقة الرابعة إضغط الرقم 5.
وبعد ما دوست علي رقم 5 طلع تاني صوت الست
عزيزي المتصل أنا عارفة إني طولت عليك بس معلش,آخرحاجة وبعد كده مش هطلب منك أي حاجة تاني , يلا قولي بقى انت في أني قسم , إذا كنت في القسم الفلاني اضغط الرقم 1,اذا كنت في القسم العلاني اضغط الرقم 2,اذاكنت ........................
(طيب أنا في القسم العلاني وأدي الرقم 3 )
عزيزي المتصل برجاء ادخال رقم الجلوس
( أهوه الرقم أهوه علله تقوليلي النتيجة قبل ما أطق ) .
الرقم الذي أدخلته أنا شكه فيه ,متروح تبص علي الرقم كده أحسن ماأجيبلك درجة إلي قدامك , روح أنا أعده أهو علي ما تيجي .
( اللهم طولك يا روح , وحياة أبويا دا رقم جلوسي )
خلاص اتأكدت عزيزي المتصل من الرقم ,يلا روح بقي هات ورقة وقلم عشان تكتب فيها النتيجة ...................هه خلاص جبت ,خد يا سيدي النتيجة ومتنساش تجيبلي الحلاوة .
( وأخيرا عرفت النتيجة لكن بعد حوالي خمس دقايق )
0 التعليقات:
إرسال تعليق