عندك ورق عاوز تخلصه ومضطر تروح مصلحة حكومية........ معلش ربنا معاك.... عارف انك مضطر بس لازم تروح أول حاجة هتعملها سيادتك انك هتخش علي المصلحة, هتدخل علي اوضة فيها كذا مكتب هتسأل أول مكتب يقابلك وتقوله:و سمحت يا باشا عاوز أخلص الورق ده . أول حاجة هيبصلك من فوق لتحت وهو ضارب بوز  وبعدين هيشاورلك علي المكتب الي جنبه ,تروح سيادتك علي المكتب الي جنبه والي قاعد عليه( اكيد واحدة ست) هتقولها لو سمحت يا مدام عاوز أخلص الورق ده .هتقولك بصوت( جاعوري): ايه يا استاذ انت مش شايف الورق الي قدامي روح عند مدام فوزية. طب فين مدام فوزية دي؟ ترد عليك الموظفة وبعدين معاك يا استاذ اسأل عليها, هو انا موظفة استعلامات . ( معلش أوعي تزعل لازم تقاوم وتواصل لغاية ماتخلص الورق) وبعدين هتنادي بأعلي صوتك......( يا جماعة يا جمااااااااعة فين مدام فوزية؟)....... وبعد خمس دقائق وبعد ما صوتك يتنبح ويتقطعلك حبل من احبالك الصوتية, ترد عليك مدام فوزية ايه يا عم صدعتنا عاوز ايه؟ (حاجة غريبة قوي هو الواحد ميعرفش يفطر في الشغل خالص ) . تروح سيادتك لمدام فوزية وتقولها ابوس ايدك عاوز أخلص الورق ده انا بقالي اكتر من ساعة هنا . مدام فوزيه: ايه يا استاذ هو انت عاوز تيجي هنا وتخلص ورقك في ساعة واحد بس, ترد عليها : أمال هعد اد ايه؟ ترد عليك مدام فوزية: هات يا سيدي الورق بتاعك ( طبعا هتحس من جواك بنشوة الانتصار وتقول في سرك اخيرا الورق هيخلص  ) لكن هيصدمك صوت مدام فوزية: يا استاذ الورق ناقص هترد عليها وانت جبت اخرك : ايه الورق الناقص؟ مدام فوزية:ورق كتيييييير فين صورة البطاقة فين صورة شهادة الميلاد فين......................؟ طبعا سيادتك هتروح جري علي اقرب مكتبة وتصور الورق ده وتروح بسرعة علي مدام فوزية وتقولها أهوه الورق اهوه , لكن مدام فوزية هتقلك انت مجبتش دمغة ليه ؟, هات بجنيه دمغة طبعا هتروح برضه جري علي الشارع وتسأل عن أقرب بوسطه وبعد ماتجيب طابع البريد ابو جنيه تروح جري علي مدام فوزية يعد ماتكون فيصت وجبت اخرك, لكن اول ما توصل مكتب مدام فوزية مش هتلاقيها ,هتقول باعلي صوتك : ياجمااااااااااااااعة فين مدام فوزية هترد عليك موظفة أعدة علي المكتب الي جنبك :يا محترم مدام فوزية روحت. هترد وانت منهار ومستسلم للامر الواقع: مدام فوزية روحت ,طب والعمل؟ هترد عليك نفس الموظفة: تيجي بكره من الساعة 9 عشان تلحق مدام فوزية. | |
0 التعليقات:
إرسال تعليق